ಸಮಗ್ರ ನ್ಯೂಸ್: ಧರ್ಮಸ್ಥಳ ಪ್ರಕರಣದಲ್ಲಿ ಆರೋಪಿ ಚಿನ್ನಯ್ಯ ತೋರಿಸಿದ ಜಾಗಗಳಲ್ಲಿ ಬಂಗ್ಲೆಗುಡ್ಡೆ ಶೋಧ ಕಾರ್ಯ ಮುಗಿದ ಬಳಿಕ, ಸೌಜನ್ಯಾ ಮಾವ ವಿಠಲಗೌಡರ ಎಂಟ್ರಿಯಾಗಿದೆ. ಈಗಾಗಲೇ ವಿಠಲಗೌಡ ವಿರುದ್ಧ ಹಲವು ಆರೋಪ ಕೇಳಿಬಂದಿದ್ದು, ಎಸ್ಐಟಿ ತನಿಖೆಯೂ ನಿರಂತರವಾಗಿ ನಡೆಯುತ್ತಿದೆ. ಇದೀಗ ಎಸ್ಐಟಿ ನಡೆಸಿದ ಬಂಗ್ಲೆಗುಡ್ಡೆ ಸ್ಥಳ ಮಹಜರಿನ ಬಳಿಕ ವಿಠಲಗೌಡ ಕೊಟ್ಟ ಹೇಳಿಕೆಯೊಂದು ವೈರಲ್ ಆಗುತ್ತಿದೆ.
...
..
ವಿಡಿಯೋದಲ್ಲಿ ಹೇಳಿದ್ದೇನು?
ಎಸ್ ಐಟಿ ವಿಚಾರಣೆ ನಡೆಯುತ್ತಿರುವಾಗಲೇ ಸೌಜನ್ಯಾ ಮಾವ ಸ್ಪೋಟಕ ಹೇಳಿಕೆ ನೀಡಿರುವುದು ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿದೆ. “ಬಂಗ್ಲೆಗುಡ್ಡೆ ಪ್ರದೇಶಕ್ಕೆ ಎಸ್ ಐಟಿ ತಂಡ ಸ್ಥಳ ಮಹಜರಿಗೆ ಎರಡು ಬಾರಿ ಕರೆದುಕೊಂಡು ಹೋಗಿದ್ದು, ಈ ಸಮಯ ಅಲ್ಲಿ ಮನುಷ್ಯರ ಕಳೇಬರಗಳು ಕಂಡುಬಂದಿವೆ. ಇದರ ಜತೆ ವಾಮಾಚಾರಕ್ಕೆ ಬಳಸುವ ಕಲಶಗಳು ಇದ್ದು ಇದನ್ನು ಅಧಿಕಾರಿಗಳಿಗೂ ಹೇಳಿದ್ದೇನೆ. ಅಲ್ಲಿನ ಪ್ರದೇಶದಲ್ಲಿ ಶವ ಮುಚ್ಚಿಹಾಕಲು ಗುಡ್ಡ ಜರಿದು ಹಾಕಿದಂತೆ ಮಣ್ಣು ಕಾಣುತ್ತಿದೆ. ಅಲ್ಲಿನ ಐದಾರು ಅಡಿ ಅಂತರದಲ್ಲಿ ಬುರುಡೆಗಳ ರಾಶಿ ಇದೆ. ಎಲುಬುಗಳು ಅಲ್ಲಲ್ಲಿ ಹರಿದಾಡಿ ಹರಡಿಕೊಂಡಿವೆ. ಕಳೇಬರಗಳು ಮಣ್ಣಿನ ಒಳಗೆ, ಬುರುಡೆಗಳು ಮೇಲ್ಭಾಗದಲ್ಲಿ ಕಾಣಿಸುತ್ತಿವೆ” ಎಂದು ಅವರು ವಿಡಿಯೋ ಮಾಡಿ ಹೇಳಿದ್ದಾರೆ.
ಇದೆಲ್ಲವೂ ಈಗ ಅಲ್ಲೇ ಹಾಗೆ ಇದ್ದು ಅದನ್ನು ಮುಟ್ಟಿಲ್ಲ. ನೋಡಿ ಬಂದಿದ್ದೇವೆ. ನಾನು ಈ ವಿಚಾರದಲ್ಲಿ ತನಿಖೆ ಬರಲು ಯಾವುದೇ ಸಮಯದಲ್ಲಿ ಸಿದ್ದನಿದ್ದೇನೆ ಎಂದು ಎಸ್ ಐಟಿಗೆ ತಿಳಿಸಿದ್ದೇನೆ. ಚಿನ್ನಯ್ಯ, ತಾನಾಸಿ, ರಂಗ ಸುಬ್ರಮಣ್ಯ ಇವರೆಲ್ಲ ಇಲ್ಲಿನ ವಿಚಾರ ತನಗೆ ತಿಳಿಸಿದ್ದು ಅವರ ಮಾಹಿತಿ ಪ್ರಕಾರ ನಾನು ಶವಗಳನ್ನು ತೋರಿಸಲು ಸಿದ್ಧ” ಎಂದು ವಿಠಲಗೌಡ ಅವರು ಹೇಳಿಕೆಯಲ್ಲಿ ತಿಳಿಸಿದ್ದಾರೆ.
ಚಿನ್ನಯ್ಯ ಅನಾಥ ಶವ ಹಾಗೂ ಯುಡಿಆರ್ ಆದ ಶವಗಳನ್ನು ಹೂಳುತ್ತಿದ್ದ ಮಾಹಿತಿಯು ವಿಠಲ ಗೌಡಗೆ ಗೊತ್ತಿತ್ತು. 2014 ರಲ್ಲಿ ಧರ್ಮಸ್ಥಳ ಬಿಟ್ಟಿದ್ದ ಚಿನ್ನಯ್ಯನ ಕುರಿತ ಮಾಹಿತಿ ಹಾಗೂ ಸಂಪರ್ಕ ನಂತರವೂ ವಿಠಲ ಗೌಡಗೆ ಇತ್ತು. ಬುರುಡೆ ಗ್ಯಾಂಗ್ ನವರು ಈ ಮಾಹಿತಿಯಂತೆ ಚಿನ್ನಯ್ಯನನ್ನು ಹುಡುಕಿ ಉಜಿರೆಯ ಹೋಟೆಲ್ ಗೆ ಕರೆಸಿ ಅಲ್ಲಿ ಭೇಟಿ ಮಾಡಿದ್ದು ಅಲ್ಲೇ ಪ್ಲಾನ್ ರೂಪಿಸಿ ಬುರುಡೆ ಪ್ರಕರಣ ಸೃಷ್ಟಿಸಿದರು ಎಂಬ ಊಹೆಯೂ ಇದೆ.
ಇದಾದ ಬಳಿಕ ಚಿನ್ನಯ್ಯನ ಜತೆ ‘ಗ್ಯಾಂಗ್’ ನಿರಂತರ ಸಂಪರ್ಕ ಇಟ್ಟುಕೊಂಡಿತ್ತು, ಆದರೆ ವಿಠಲಗೌಡ ಸ್ವಲ್ಪ ಅಂತರ ಕಾಯ್ದುಕೊಂಡಿದ್ದರು ಎನ್ನಲಾಗಿದೆ. ವಿಠಲ್ ಗೌಡಗೆ ಬಂಗ್ಲೆಗುಡ್ಡೆ ಕಾಡಿನ ಸಂಪೂರ್ಣ ಪರಿಸರದ ಅರಿವು ಇದ್ದು, ಇಲ್ಲಿನ ಸ್ಥಳಗಳಲ್ಲಿ ಅವರು ಆಗಾಗ ಸುತ್ತಾಟ ನಡೆಸುತ್ತಿದ್ದರು ಎಂದು ಹೇಳಲಾಗಿದೆ. ಅಲ್ಲದೆ ಚಿನ್ನಯ್ಯನಿಗೆ ದೂರು ಕೊಡಲು ಬುರುಡೆ ತಂದುಕೊಟ್ಟಿದ್ದು ಕೂಡಾ ವಿಠಲಗೌಡ ಎಂಬ ಮಾಹಿತಿಯೂ ಇದೆ.
