ಸಮಗ್ರ ನ್ಯೂಸ್: ದಕ್ಷಿಣ ಅಮೆರಿಕಾದ ಕೊಲಂಬಿಯಾ ದೇಶದ ಪಶ್ಚಿಮ ಭಾಗದಲ್ಲಿ ಸಂಭವಿಸಿದ ಪ್ರಬಲ ಭೂಕಂಪಕ್ಕೆ ಕನಿಷ್ಠ 132 ಜನರು ಜೀವ ಕಳೆದುಕೊಂಡಿದ್ದು, ನೂರಾರು ಜನರು ಗಾಯಗೊಂಡಿದ್ದಾರೆ. ರಿಕ್ಟರ್ ಮಾಪಕದಲ್ಲಿ ಈ ಭೂಕಂಪದ ತೀವ್ರತೆ 7.4 ರಷ್ಟು ದಾಖಲಾಗಿದೆ.
...
..
.ಭೂಕಂಪದ ಧಕ್ಕೆಯಿಂದಾಗಿ ಹಲವು ನಗರಗಳಲ್ಲಿ ಬಹುಮಹಡಿ ಕಟ್ಟಡಗಳು ಧರಾಶಾಹಿಯಾಗಿದ್ದು, ಪ್ರಸ್ತುತ ಪರಿಸ್ಥಿತಿ ತೀವ್ರ ವಿಪರೀತಕ್ಕೆ ತಿರುಗಿದೆ.
ಅಮೆರಿಕದ ಭೂವೈಜ್ಞಾನಿಕ ಸಮೀಕ್ಷೆ ನೀಡಿರುವ ಮಾಹಿತಿಯ ಪ್ರಕಾರ, ರಾಜಧಾನಿ ಬೊಗೋಟಾದಿಂದ ಸುಮಾರು 400 ಕಿಲೋಮೀಟರ್ ದೂರದಲ್ಲಿರುವ ಚೊಕೊ ಪ್ರದೇಶದ ‘ಸಾನ್ ಜೋಸ್ ಡೆಲ್ ಪಾಲ್ಮರ್’ ಭೂಕಂಪದ ಕೇಂದ್ರ ಬಿಂದುವಾಗಿತ್ತು. ಭೂಮಿಯ ಅಡಿಯಲ್ಲಿ ಸುಮಾರು 107 ಕಿಲೋಮೀಟರ್ ಆಳದಲ್ಲಿ ಈ ಕಂಪನ ಉಂಟಾಗಿದ್ದು, ಇದರ ಅನುಭವ ನೆರೆಯ ಇಕ್ವೆಡಾರ್ ದೇಶದಲ್ಲೂ ಆಗಿದೆ.
ಭೂಕಂಪದ ರಭಸಕ್ಕೆ ಪೆರೇರಾ, ಕಾಲಿ ಹಾಗೂ ಕಿಬ್ಡೊ ನಗರಗಳಲ್ಲಿ ಅನೇಕ ಮನೆಗಳು ಮತ್ತು ಕಟ್ಟಡಗಳು ನೆಲಸಮವಾಗಿವೆ. ಪೆರೇರಾ ನಗರ ಒಂದರಲ್ಲೇ 18ಕ್ಕೂ ಹೆಚ್ಚು ಜನರು ಪ್ರಾಣ ಕಳೆದುಕೊಂಡಿದ್ದಾರೆ ಎಂದು ತಿಳಿದುಬಂದಿದೆ. ಮ್ಯಾನಿಜಾಲೆಸ್ ನಗರದಲ್ಲಿದ್ದ ಪ್ರಸಿದ್ಧ ಐತಿಹಾಸಿಕ ಕೆಥೆಡ್ರಲ್ ಚರ್ಚ್ನ ಒಂದು ಗೋಪುರ ಧರೆಗುರುಳಿದೆ. ಇನ್ನು ಅನೇಕ ಕಟ್ಟಡಗಳ ಅವಶೇಷಗಳ ಅಡಿಯಲ್ಲಿ ಜನರು ಸಿಲುಕಿಕೊಂಡಿದ್ದು, ರಕ್ಷಣಾ ಸಿಬ್ಬಂದಿ ತೆರವು ಕಾರ್ಯಾಚರಣೆಯನ್ನು ಭರದಿಂದ ನಡೆಸುತ್ತಿದ್ದಾರೆ.
ಈ ಭೀಕರ ನೈಸರ್ಗಿಕ ವಿಕೋಪದ ಕಾರಣದಿಂದಾಗಿ ಪಶ್ಚಿಮ ಕೊಲಂಬಿಯಾದ ಪೆರೇರಾ, ಮ್ಯಾನಿಜಾಲೆಸ್, ಕಿಬ್ಡೊ ಸೇರಿದಂತೆ ಒಟ್ಟು ಆರು ವಿಮಾನ ನಿಲ್ದಾಣಗಳಿಗೆ ಹಾನಿಯಾಗಿದ್ದು, ಅವುಗಳ ಕಾರ್ಯಾಚರಣೆಯನ್ನು ತಕ್ಷಣದಿಂದಲೇ ಸ್ಥಗಿತಗೊಳಿಸಲಾಗಿದೆ.
