ಸಮಗ್ರ ನ್ಯೂಸ್: ದೆಹಲಿಯಿಂದ ಬೆಂಗಳೂರಿಗೆ ಆಗಮಿಸುತ್ತಿದ್ದ ಏರ್ ಇಂಡಿಯಾ ವಿಮಾನವೊಂದು ಕೆಂಪೇಗೌಡ ಅಂತರರಾಷ್ಟ್ರೀಯ ವಿಮಾನ ನಿಲ್ದಾಣದಲ್ಲಿ ಲ್ಯಾಂಡಿಂಗ್ ಆಗುವ ವೇಳೆ ಭೀಕರ ಅಪಘಾತದಿಂದ ಕೂದಲೆಳೆ ಅಂತರದಲ್ಲಿ ಪಾರಾಗಿದೆ. ವಿಮಾನವು ರನ್ವೇ ಮೇಲೆ ಇಳಿಯುವಾಗ ಅದರ ಹಿಂಭಾಗವು ನೆಲಕ್ಕೆ ಅಪ್ಪಳಿಸಿದೆ. ಅದೃಷ್ಟವಶಾತ್ ವಿಮಾನದಲ್ಲಿದ್ದ ಎಲ್ಲಾ ಪ್ರಯಾಣಿಕರು ಮತ್ತು ಸಿಬ್ಬಂದಿ ಸುರಕ್ಷಿತವಾಗಿದ್ದಾರೆ.
...
..
ದೆಹಲಿಯಿಂದ ಪ್ರಯಾಣಿಕರನ್ನು ಹೊತ್ತು ತರುತ್ತಿದ್ದ ಏರ್ ಇಂಡಿಯಾದ AI2651 ವಿಮಾನವು ಬೆಂಗಳೂರು ವಿಮಾನ ನಿಲ್ದಾಣದಲ್ಲಿ ಲ್ಯಾಂಡ್ ಆಗಲು ಸಿದ್ಧವಾಗಿತ್ತು. ಆ ಸಮಯದಲ್ಲಿ ಅದರ ಮುಂದೆ ಚಲಿಸುತ್ತಿದ್ದ ಮತ್ತೊಂದು ವಿಮಾನದಿಂದಾಗಿ ಉಂಟಾದ ‘ವೇಕ್ ಟರ್ಬ್ಯುಲೆನ್ಸ್’ (Wake Turbulence – ಗಾಳಿಯ ತೀವ್ರ ಏರಿಳಿತ) ಪರಿಣಾಮವಾಗಿ ಈ ವಿಮಾನದ ನಿಯಂತ್ರಣ ಹಾಗೂ ಸ್ಥಿರತೆಗೆ ಅಡ್ಡಿಯುಂಟಾಯಿತು. ಹೀಗಾಗಿ ವಿಮಾನದ ಸಮತೋಲನ ತಪ್ಪಿ, ರನ್ವೇಗೆ ಇಳಿಯುವಾಗ ಅದರ ತಳಭಾಗದ ಕೊನೆಯ ತುದಿ (Tail) ನೆಲಕ್ಕೆ ಜೋರಾಗಿ ತಾಗಿದೆ.
ಘಟನೆ ಸಂಭವಿಸಿದ ತಕ್ಷಣವೇ ಪೈಲಟ್ಗಳು ಸಮಯಪ್ರಜ್ಞೆ ಮೆರೆದು ವಿಮಾನವನ್ನು ಸುರಕ್ಷಿತವಾಗಿ ರನ್ವೇ ಮೇಲೆ ನಿಲ್ಲಿಸುವಲ್ಲಿ ಯಶಸ್ವಿಯಾಗಿದ್ದಾರೆ. ವಿಮಾನದಲ್ಲಿದ್ದ ಎಲ್ಲಾ ಪ್ರಯಾಣಿಕರು ಮತ್ತು ಸಿಬ್ಬಂದಿ ಯಾವುದೇ ಗಾಯಗಳಿಲ್ಲದೆ ಸಾಮಾನ್ಯವಾಗಿಯೇ ವಿಮಾನದಿಂದ ಕೆಳಗಿಳಿದಿದ್ದಾರೆ ಎಂದು ಏರ್ ಇಂಡಿಯಾ ಸಂಸ್ಥೆ ಸ್ಪಷ್ಟಪಡಿಸಿದೆ.
ವಿಮಾನಯಾನ ತಜ್ಞರ ಪ್ರಕಾರ, ಒಂದು ವಿಮಾನದ ಹಾರಾಟದ ತಕ್ಷಣವೇ ಮತ್ತೊಂದು ವಿಮಾನವು ಅತಿ ಹತ್ತಿರದಲ್ಲಿ ಇಳಿಯಲು ಅಥವಾ ಹಾರಲು ಪ್ರಯತ್ನಿಸಿದಾಗ ಇಂತಹ ‘ವೇಕ್ ಟರ್ಬ್ಯುಲೆನ್ಸ್’ ಉಂಟಾಗಿ ವಿಮಾನದ ನಿಯಂತ್ರಣ ಕೈತಪ್ಪುವ ಸಾಧ್ಯತೆಗಳಿರುತ್ತವೆ. ಸದ್ಯ ದೊಡ್ಡ ಅನಾಹುತವೊಂದು ತಪ್ಪಿರುವುದು ಎಲ್ಲರ ನಿಟ್ಟುಸಿರಿಗೆ ಕಾರಣವಾಗಿದೆ.
