ಪಶ್ಚಿಮ ಘಟ್ಟದ ಮೇಲಿನ ದೌರ್ಜನ್ಯಕ್ಕೆ ಬತ್ತಿ ಹೋದಳೇ ನೇತ್ರಾವತಿ|ಜೀವನದಿ ಬರಡಾಗಲು ಕಾರಣವಾಯ್ತೇ ಎತ್ತಿನ ಹೊಳೆ?

ಸಮಗ್ರ ನ್ಯೂಸ್: ಸುಮಾರು 8 ತಿಂಗಳ ಹಿಂದೆ ಉಪ್ಪಿನಂಗಡಿಯಲ್ಲಿ ನದಿಯೊಂದು ಬೋರ್ಗರೆಯುತ್ತಿತ್ತು. ನಾಲ್ಕು ತಿಂಗಳ ಹಿಂದೆ ಹಾಗೋ ಹೀಗೋ ಹರಿಯುತ್ತಿತ್ತು. ಈಗ ಆ ನದಿ ಎಲ್ಲೆಂದು ಜನ ಹುಡುಕುತ್ತಿದ್ದಾರೆ!
ಇದು ಉಪ್ಪಿನಂಗಡಿಯಲ್ಲಿ ಹರಿಯುವ ದಕ್ಷಿಣ ಕನ್ನಡದ ಜೀವನದಿ ನೇತ್ರಾವತಿ ನಿರ್ಜೀವವಾಗಿರುವ ಬಗೆ!! ಹೌದು… ಕೋಲಾರ, ತುಮಕೂರು ಕಡೆಗೆ ಇದನ್ನು ತಿರುಗಿಸಿ ಜೀವ ಜಲ ಒದಗಿಸುತ್ತೇವೆಂದು ರಾಜಕಾರಣಿಗಳು ನಂಬಿಸಿರುವ ಅದೇ ನೇತ್ರಾವತಿ ನದಿಯಿದು!

ಇನ್ನೆರಡು ತಿಂಗಳು ಕಳೆದರೆ ಮತ್ತ ಇಲ್ಲಿ ನದಿ ಭೋರ್ಗರೆಯುತ್ತದೆ. ಜನ ಇಂದಿನ ಪರಿಸ್ಥಿತಿಯನ್ನು ಮರೆತುಬಿಡುತ್ತಾರೆ. ಆ ಮಾತು ಬೇರೆ. ಆದರೆ ಮಳೆಗಾಲದಲ್ಲಿ ಪ್ರವಾಹೋಪಾದಿಯಲ್ಲಿ ಹರಿಯುವ ಈ ನದಿ ಏಪ್ರಿಲ್ ಗೂ ಮುನ್ನವೇ ಈಗ ಬಟಾಬಯಲಾದದ್ದು ಹೇಗೆ? ಪರಿಸ್ಥಿತಿ ಹೀಗೇ ಮುಂದುವರಿದರೆ ಹೇಗೆ ಎಂಬ ಮಾತು ಕೇಳಿ ಬರುತ್ತಿದೆ.

ಉಪ್ಪಿನಂಗಡಿಯು ಧರ್ಮಸ್ಥಳದ ಕಡೆಯಿಂದ ಹರಿದು ಬರುವ ನೇತ್ರಾವತಿ ಮತ್ತು ಸುಬ್ರಹ್ಮಣ್ಯ ಕಡೆಯಿಂದ ಹರಿದು ಬರುವ ಕುಮಾರಧಾರ ನದಿಗಳ ಸಂಗಮ ಸ್ಥಳ. ಇಲ್ಲಿಂದ ಮುಂದಕ್ಕೆ ನದಿ ನೇತ್ರಾವತಿಯೆಂಬ ಹೆಸರಿನಲ್ಲಿ ಮುಂದುವರಿಯುತ್ತದೆ. ಈಗ ವಿಷಯ ಏನಪ್ಪಾ ಅಂದ್ರೆ ಈಗ ಉಪ್ಪಿನಂಗಡಿಯಿಂದ ಮುಂದಕ್ಕೆ ಸಾಗಿ ಸಮುದ್ರ ಸೇರುತ್ತಿರುವುದು ನೇತ್ರಾವತಿಯಲ್ಲ, ಕುಮಾರಧಾರ! ಅಂದರೆ ನೇತ್ರಾವತಿ ನದಿ ಸಮುದ್ರ ಸೇರಲು ಹೆಚ್ಚೂಕಮ್ಮಿ 60 ಕಿ.ಮೀ. ಇರುವಾಗಲೇ ಈ ನದಿ ಸಂಪೂರ್ಣ ಬತ್ತಿ ಹೋಗಿದೆ. ಇನ್ನು ಇದರ ಉಪನದಿಯಾದ ಕುಮಾರಧಾರದ ಪರಿಸ್ಥಿತಿ ಉತ್ತಮವಾಗೇನೂ ಇಲ್ಲ. ಸಂಪೂರ್ಣ ಬತ್ತಿ ಹೋಗಿಲ್ಲ ಎನ್ನುವುದಷ್ಟೇ ಸಮಾಧಾನದ ಸಂಗತಿ.

ಪಶ್ಚಿಮ ಘಟ್ಟದಿಂದ ಹೆಚ್ಚುಕಡಿಮೆ 100 ಕಿ.ಮೀ. ಅಂತರದಲ್ಲೇ ಸಮುದ್ರ ಸಿಗುವುದರಿಂದ ಕರಾವಳಿಯ ನದಿಗಳಲ್ಲಿ ನೀರನ್ನು ಹಿಡಿದಿಟ್ಟುಕೊಳ್ಳುವ ಶಕ್ತಿಯೂ ಇಲ್ಲ. ಇಲ್ಲಿನ ಭೌಗೋಳಿಕ ರಚನೆ ಅಣೆಕಟ್ಟುಗಳನ್ನು ಕಟ್ಟಲು ಪೂರಕವಾಗಿಲ್ಲ. ಹೀಗಾಗಿ ಅಲ್ಲಲ್ಲಿ ಸಣ್ಣಪುಟ್ಟ ಚೆಕ್ ಡ್ಯಾಂಗಳನ್ನು ಕಟ್ಟಲಾಗಿದೆ. ಅದರಲ್ಲೂ ಉಳಿಯುವ ನೀರೂ ಅಷ್ಟಕಷ್ಟೇ. ಮಳೆ ಬರುವುದು ತಡವಾದರೆ ಉಳಿದ ದಿನಗಳ ಪರಿಸ್ಥಿತಿ ದೇವರಿಗೇ ಪ್ರೀತಿ.

ಪಶ್ಚಿಮ ಘಟ್ಟದ ಮೇಲೆ ಅದೆಂತಹಾ ಗದಾಪ್ರಹಾರವಾಗಿದೆ ಎಂಬುದಕ್ಕೆ ಕಳೆದೈದು ವರ್ಷದಲ್ಲಿ ಈ ಭಾಗದಲ್ಲಿ ಆಗುತ್ತಿರುವ ಪ್ರಕೃತಿ ವಿಕೋಪಗಳೇ ಸಾಕ್ಷಿ. ಒಂದೆಡೆ ಸಕಲೇಶಪುರದಿಂದ ಶಿರಾಡಿ ಘಾಟಿ ಇಳಿಯುವ ಪ್ರಾರಂಭದಲ್ಲಿ ಎತ್ತಿನ ಹೊಳೆ ಯೋಜನೆ, ಘಾಟಿ ಮುಗಿಯುವ ಹೊತ್ತಿಗೆ ಸಿಗುವ ಗುಂಡ್ಯದ ಬಳಿ ಕೆಂಪುಹೊಳೆ ವಿದ್ಯುಚ್ಛಕ್ತಿ ಯೋಜನೆಗಳೇ ಸಾಕು ಈ ನದಿಯನ್ನು ಆಪೋಷನ ಪಡೆಯಲು. ಇವೆರಡು ಯೋಜನೆಯಲ್ಲಿ ಬರುವ ಉಪನದಿಗಳು ಸೇರುವುದು ಕುಮಾರಧಾರವನ್ನೇ ಆದರೂ ಕುಮಾರಧಾರಾ ಸೇರುವುದು ನೇತ್ರಾವತಿಯನ್ನೇ ತಾನೇ?

ಇನ್ನೂ ಬೇಕಾ ಎತ್ತಿನಹೊಳೆ?
ಸಕಲೇಶಪುರದ ಆಸುಪಾಸಿನಲ್ಲಿ ಎತ್ತಿನಹೊಳೆ ಸೇರಿದಂತೆ 8 ತೊರೆಗಳಿಗೆ ಬ್ಯಾರೇಜ್ ಕಟ್ಟಿ ಅಲ್ಲಿ ಸಂಗ್ರಹಿಸಿದ ನೀರನ್ನು ಮೇಲಕ್ಕೆತ್ತಿ ಪೈಪುಗಳ ಮೂಲಕ ಸುಮಾರು 274 ಕಿ.ಮೀ. ಸಾಗಿಸುವುದಂತೆ! ಹಾಗಂತ ಕಳೆದ ಕೆಲ ವರ್ಷಗಳಿಂದ ಕೋಲಾರ, ತುಮಕೂರಿನ ಮುಗ್ಧ ಜನರನ್ನು ನಂಬಿಸಿ ಮತ ಕೇಳುತ್ತಲೇ ಇದ್ದಾರೆ. ಅಲ್ಲಿನ ಜನರು ಸಹ ಇಂದಲ್ಲವಾದರೆ ನಾಳೆ ಜೀವ ಜಲ ನಮ್ಮೂರು ತಲುಪೀತು ಎಂಬ ಆಶಾಭಾವನೆಯಲ್ಲಿ ಇದ್ದಾರೆ. ಈಗ ಎತ್ತಿನ ಹೊಳೆ ಸಮರ್ಥಕರು ಹೇಳುತ್ತಿರುವುದು ಮಳೆಗಾಲದ ಹೆಚ್ಚುವರಿ ನೀರನ್ನು ಲಿಫ್ಟ್ ಮಾಡುವ ಯೋಜನೆ ಇದು ಎಂದು.
ಆದರೆ ಸಕಲೇಶಪುರದಲ್ಲಿ ಕಳೆದೈದು ವರ್ಷಗಳಲ್ಲಿ ಆಗಿರುವ ಪ್ರಗತಿ(ದುರ್ಗತಿ)ಯನ್ನು ಒಮ್ಮೆ ಪರಿಶೀಲಿಸಿದರೆ ಇದು ಎಲ್ಲಿಗೇ ತಲುಪೀತು ಎಂದು ಅಂದಾಜಿಸುವುದು ಕಷ್ಟ. ಒಟ್ಟಾರೆ ಇದು ಪಶ್ಚಿಮಘಟ್ಟವನ್ನು ಮುಗಿಸಲು, ಕರಾವಳಿಯ ನದಿಗಳನ್ನು ಬರಡಾಗಿಸಿ ಒಂದಿಷ್ಟು ಮಂದಿ ತಮ್ಮ ಜೇಬುಗಳನ್ನು ತುಂಬಿಸಿಕೊಳ್ಳಲು ಮಾಡಿರುವ ಯೋಜನೆ ಎಂಬುದು ಕಣ್ಮಿಗೆ ರಾಚುವಂತಿದೆ.

ಕೋಲಾರ, ತುಮಕೂರು ಜಿಲ್ಲೆಗಳ ಗಡಿಯಂಚಿನ ತಾಲೂಕುಗಳ ನೀರಿನ ಪರಿಸ್ಥಿತಿಯನ್ನು ಕಣ್ಣಾರೆ ಕಂಡ ಯಾವನಿಗಾದರೂ ಕಣ್ಣಲ್ಲಿ ನೀರು ಬರಲೇ ಬೇಕು. ಅಷ್ಟು ದಯನೀಯವಾಗಿದೆ ಅಲ್ಲಿನ ಪರಿಸ್ಥಿತಿ. ಅಲ್ಲಿನ ಜನರಿಗೆ ಪಶ್ಚಿಮ ಘಟ್ಟದ ಖನಿಜಯುಕ್ತ ಶುದ್ಧ ಜೀವಜಲ ಸಿಗುವುದಾದರೆ ಅದನ್ನು ಬೇಡ ಅನ್ನುವಷ್ಟು ನಿರ್ದಯಿಗಳು ಖಂಡಿತ ಮಲೆನಾಡಿನ, ಕರಾವಳಿಯ ಕನ್ನಡಿಗರಲ್ಲ.

ಭೌಗೋಳಿಕವಾಗಿ ಕೋಲಾರ, ತುಮಕೂರು ಸೇರಿದಂತೆ ಎತ್ತಿನಹೊಳೆ ಯೋಜನೆಯ ಫಲಾನುಭವಿ ಜಿಲ್ಲೆಗಳು ಪಶ್ಚಿಮ ಫಟ್ಟಕ್ಕಿಂತ ಎತ್ತರದಲ್ಲಿವೆ. ಇಲ್ಲಿಂದ ನೀರನ್ನು ಲಿಫ್ಟ್ ಮಾಡುವುದು ಕಷ್ಟವೂ ಹೌದು, ಎಲ್ಲಾ ರೀತಿಯಿಂದ ನಷ್ಟವೂ ಹೌದು. ಹೀಗಾಗಿ ಇದಕ್ಕೆ ಪರ್ಯಾಯ ಯೋಜನೆಯನ್ನು ಕಂಡುಹಿಡಿವ ಅಗತ್ಯವಿದೆ.
ಚಿಕ್ಕಮಗಳೂರು, ಚಿತ್ರದುರ್ಗ, ದಾವಣಗೆರೆ ಹಾಗೂ ತುಮಕೂರು ಜಿಲ್ಲೆಗಳ 5,57,022 ಎಕರೆ (2,25,515 ಹೆಕ್ಟೇರ್) ಭೂಪ್ರದೇಶಕ್ಕೆ ನೀರಾವರಿ ಕಲ್ಪಿಸುವ ಭದ್ರಾ ಮೇಲ್ದಂಡೆ ಯೋಜನೆ ನಿಜಕ್ಕೂ ಉತ್ತಮ ಯೋಜನೆ. ಅದೇ ರೀತಿಯಲ್ಲಿ ಬೇರೆ ಯಾವುದಾದರೂ ಯೋಜನೆಯನ್ನು ಕೈಗೆತ್ತಿಕೊಳ್ಳಬಹುದೇ ಎಂದು ಚಿಂತನೆ ನಡೆಸಲು ಇದು ಸಕಾಲ. ಉತ್ತರ ಕರ್ನಾಟಕದಲ್ಲಿ ಕೃಷ್ಣಾ, ತುಂಗಭದ್ರಾ ಸೇರಿದಂತೆ ಅನೇಕ ನದಿಗಳು ಮಳೆಗಾಲದಲ್ಲಿ ಪ್ರವಾಹೋಪಾದಿಯಲ್ಲಿ ಹರಿಯುತ್ತದೆ.

ಅದೇ ನೀರನ್ನು ವ್ಯವಸ್ಥಿತವಾಗಿ ಬೇರೆಡೆಗೆ ತಿರುಗಿಸುವ ಅಥವಾ ಸಂಗ್ರಹಿಸುವ ಕಾರ್ಯ ನಡೆಸಲು ಸಾಧ್ಯವಿದೆಯೇ ಎಂದು ಚಿಂತಿಸುವುದು ಒಳಿತು. ಇದರಿಂದ ಪಶ್ಚಿಮ ಘಟ್ಟಕ್ಕೂ ಹಾನಿಯಾಗುವುದಿಲ್ಲ. ಜೊತೆಗೆ ಮಳೆಗಾಲದ ಹೆಚ್ಚುವರಿ ನೀರನ್ನು ಸಹ ಸಂಗ್ರಹಿಸಿಟ್ಟುಕೊಂಡಂತೆ ಆಗುವುದು.

ಎತ್ತಿನ ಹೊಳೆ, ಕುದುರೆಮುಖ ಯೋಜನೆಗಳೆಲ್ಲ ಭವಿಷ್ಯದ ಕರಾಳತೆಯ ವಾಸ್ತವವನ್ನು ತೆರೆದಿಡುವ ಒಂದೆರಡು ಯೋಜನೆಗಳಷ್ಟೇ. ಇಂತಹ ಹತ್ತಾರು ಅಧಿಕ ಪ್ರಸಂಗಗಳನ್ನು ಭೂಮಿ ತಾಯಿ ಸಹಿಸುತ್ತಲೇ ಬಂದಿದ್ದಾಳೆ. ಇನ್ನೂ ಪಶ್ಚಿಮ ಘಟ್ಟದ ಮೇಲೆ ಹೊಡೆತ ಕೊಡುತ್ತಲೇ ಹೋದರೆ ಮುಂದಾಗುವ ಅನಾಹುತಗಳನ್ನು ಊಹಿಸುವುದೂ ಅಸಾಧ್ಯ. ನೇತ್ರಾವತಿ ಅಂತಲ್ಲ, ಕರಾವಳಿಯ ಎಲ್ಲಾ ನದಿಗಳು ಇದೀಗ ಏಪ್ರಿಲ್ ಮುನ್ನವೇ ಬತ್ತಿ ಹೋಗಿವೆ. ಮುಂದಿನ ವರ್ಷ ಮಾರ್ಚ್ ನಲ್ಲೇ ಬತ್ತಿ ಹೋಗಬಹುದು.

ನದಿಗಳು ಬತ್ತಿರುವ ಸಮಯದಲ್ಲೇ ಚುನಾವಣೆ ಸಹ ಬಂದಿದೆ. ಮತದಾರ ಪ್ರಭುಗಳನ್ನು ರೈಲು ಹತ್ತಿಸುವ ರಾಜಕಾರಣಿಗಳು ಕರಾವಳಿಯಲ್ಲೂ ಇದ್ದಾರೆ, ಮಲೆನಾಡಲ್ಲೂ ಇದ್ದಾರೆ, ಬಯಲು ಸೀಮೆಗೂ ಬರುತ್ತಾರೆ. ನೇತ್ರಾವತಿ ತಿರುವು ಯೋಜನೆ ಪರವಾಗಿ ಬಯಲು ಸೀಮೆಯಲ್ಲಿ ಮತ ಗಿಟ್ಟಿಸಿಕೊಂಡ ಇಬ್ಬರು ಮಾಜಿ ಮುಖ್ಯಮಂತ್ರಿಗಳು ಇಂದು ನಿವೃತ್ತಿಯಂಚಿನಲ್ಲಿ ಇದ್ದಾರೆ. ಇನ್ನು ಇದರ ವಿರುದ್ಧ ಉಪ್ಪಿನಂಗಡಿಯಲ್ಲಿ ಹೋರಾಟ ನಡೆದಾಗ ನೇತ್ರಾವತಿಗಾಗಿ ಪ್ರಾಣತ್ಯಾಗಕ್ಕೂ ಸಿದ್ಧ ಎಂದು ಹೇಳಿದ್ದ ಜನಪ್ರತಿನಿಧಿಯೊಬ್ಬರು ಮತ್ತೆ ಇದರ ಉಸಾಬರಿಗೆ ಹೋಗಿಲ್ಲ, ಉಬಾರಿ(ಉಪ್ಪಿನಂಗಡಿ)ಗೆ ಬಂದ್ರೆ ಜನ ಬಿಡೊಲ್ಲ. ಈ ಬಾರಿ ರಾಜಕಾರಣಿಗಳು ಮತಭಿಕ್ಷೆ ಬೇಡಲು ಬಂದಾಗ ಈ ವಿಚಾರ ಮುಂದಿಟ್ಟು ನಿಮ್ಮ ನಿಲುವು ಸ್ಪಷ್ಟಪಡಿಸಿ ಎಂದು ಕೇಳುವ ಸರದಿ ಮತದಾರರದ್ದು. ಈಗ ಬಿಟ್ಟರೆ ಮತ್ತೈದು ವರ್ಷ ಅವರ್ಯಾರೂ ಕೈಗೆ ಸಿಗರು. ಆದರೆ ಸಕಲೇಶಪುರದಲ್ಲಿ ಎತ್ತಿನ ಹೊಳೆ ಕೆಲಸ ಮಾತ್ರ ಇನ್ನೈದು ವರ್ಷ ಕಳದರೂ ಅಷ್ಟೇ ಇರುತ್ತದೆ. ಪ್ರತಿವರ್ಷ ಬಜೆಟ್ ನಲ್ಲಿ ಹಣ ಬಿಡುಗಡೆಯಾದ ಹಾಗೆ ನೂರಾರು ದೊಡ್ಡ ದೊಡ್ಡ ಪೈಪುಗಳ ರಾಶಿ ಬೀಳಬಹುದು ಹೊರತು ಅಲ್ಲಿ ಮತ್ತೇನಾಗುವುದಿಲ್ಲ.

ಕೃಪೆ: ವಿಜಯ ಕರ್ನಾಟಕ